Leiðbeiningar / Stofna ehf.

Stofna ehf.: hvað gerist næst

Þú ert með kennitölu á félagið, eða ert að sækja um hana. Hér er það sem gerist fyrstu sjö dagana, í réttri röð, og hvað hvert skref kostar.

Síðast yfirfarið 25. október 2026.

Dagur 0: skráningin í fyrirtækjaskrá

Einkahlutafélag verður til þegar fyrirtækjaskrá Skattsins skráir það. Til þess þarf hlutafé, stofnskjöl og skráningargjald. Hlutaféð er að lágmarki 500.000 kr. og það þarf allt að vera greitt inn við stofnun, með peningum á reikning eða með öðrum verðmætum sem lögmaður eða endurskoðandi staðfestir. Skráningargjaldið fyrir nýskráningu ehf. er 140.500 kr. samkvæmt gjaldskrá fyrirtækjaskrár.

Skjölin eru fá en þau þurfa að vera rétt. Ef þú stofnar félagið ein(n): tilkynning um skráningu (RSK 17.21), samþykktir, stofnskrá og stofngerð, auk tilkynningar um raunverulega eigendur (RSK 17.27). Ef stofnendur eru fleiri koma stofnsamningur og stofnfundargerð í stað stofnskrár og stofngerðar. Skatturinn birtir sýnishorn af öllum skjölunum í Word-sniði á síðunni um einkahlutafélög, og það er einfaldast að byrja þar.

Einfaldasta leiðin er rafræn skráning á þjónustusíðum Skattsins með rafrænum skilríkjum. Þá fara skjölin og greiðslan í gegn á einum stað og krafa fyrir gjaldinu birtist í heimabankanum. Pappírsskráning er líka í boði, og skönnuð afrit duga, en afgreiðslan tekur um 10 til 12 virka daga eftir að öll gögn og greiðsla eru komin.

Dagur 1 til 3: kennitalan og bankareikningurinn

Þegar skráningin er afgreidd fær félagið kennitölu sem byrjar á 4, 5, 6 eða 7. Hún er lykillinn að öllu sem kemur á eftir: bankareikningi, skráningum hjá Skattinum, reikningum til viðskiptavina.

Bankinn þarf kennitöluna, stofnskjölin og upplýsingar um raunverulega eigendur áður en hann opnar reikning fyrir félagið. Bankarnir eru misfljótir, svo það borgar sig að sækja um um leið og kennitalan er komin. Þú getur sent reikninga áður en bankareikningurinn er tilbúinn, en greiðslur eiga að fara inn á reikning félagsins, aldrei á þinn eigin.

Dagur 3 til 7: tilkynningarnar til Skattsins

Tvær skráningar þarf að hugsa um strax, og báðar eru á sama eyðublaði, RSK 5.02, tilkynningu til launagreiðenda- og virðisaukaskattsskrár. Skatturinn segir að tilkynna skuli upphaf rekstrar að minnsta kosti 8 dögum áður en starfsemi hefst, og starfsemin telst hafin þegar kostnaður byrjar að falla til, ekki þegar fyrsti reikningurinn fer út.

Virðisaukaskattsskrá: skylda ef félagið selur virðisaukaskattsskylda vöru eða þjónustu fyrir meira en 2.000.000 kr. á tólf mánaða tímabili. Undir því marki má sleppa skráningu, en þá má heldur ekki leggja VSK á reikningana.
Launagreiðendaskrá: skylda ef félagið greiðir laun, þar með talið þér sjálfri eða sjálfum sem eiganda sem vinnur í félaginu (reiknað endurgjald).

Næsta leiðbeining fer nánar í þessar tvær skráningar. Hér er aðalatriðið tímasetningin: gerðu þetta fyrstu vikuna, ekki þegar fyrsti reikningurinn er að fara út.

Frá fyrsta degi: bókhaldið

Öll félög eru bókhaldsskyld frá stofnun samkvæmt lögum um bókhald, hvort sem þau hafa veltu eða ekki. Það þýðir ekki að þú þurfir bókara strax. Það þýðir að hver reikningur, hver kvittun og hver bankafærsla þarf að eiga sér stað í bókhaldi sem hægt er að sýna. Hlutaféð sjálft er fyrsta færslan: innborgun á bankareikning félagsins á móti hlutafé.

Reikningsárið er almanaksárið nema annað sé ákveðið í samþykktunum. Félag sem er stofnað í október á því sitt fyrsta reikningsár fram að 31. desember sama ár, og þarf ársreikning og skattframtal fyrir það, þótt tímabilið sé stutt.

Tvennt sem gleymist oft

Lífeyrissjóður: um leið og félagið greiðir laun, líka þér sjálfri eða sjálfum, þarf að greiða iðgjald í lífeyrissjóð. Veldu sjóðinn áður en fyrsta launakeyrslan fer fram.
Raunverulegir eigendur: tilkynningin um þá fylgir skráningunni, en breytingar á eignarhaldi þarf að tilkynna innan 8 daga.

Listinn fyrir fyrstu vikuna

Hlutafé greitt inn, stofnskjölin undirrituð, skráning send og gjaldið greitt.
Kennitala móttekin. Sótt um bankareikning samdægurs.
RSK 5.02 sent: virðisaukaskattsskrá ef veltan fer yfir 2.000.000 kr. á ári, launagreiðendaskrá ef einhver fær laun.
Bókhaldskerfi valið og hlutaféð bókað sem fyrsta færslan.
Lífeyrissjóður valinn ef laun verða greidd.

Skráningarform Skildings: nafn fyrirtækis, kennitala fyrirtækis, nafn, netfang, farsími, lykilorð og hnappurinn Stofna aðgang. — Aðgangur í Skildingi er stofnaður með kennitölu félagsins. Hægt er að sleppa henni og bæta við síðar.

Heimildir

Skildingur gerir hvert skref á listanum með þér: reikningar, bókhald, VSK-skil og laun á einum stað. Fyrstu 3 mánuðirnir eru fríir fyrir fyrirtæki yngri en 6 mánaða, ekkert greiðslukort.

Stofna aðgang